O xoves pola tarde celebramos a festa de entroido no colexio, organizada pola ANPA. Foi unha tarde moi especial na que os nenos e nenas puideron gozar dun chocolate quente, churros e moito baile. As crianzas viñan guapísimas cos seus disfraces, cheos de cor e creatividade, e pasámolo xenial compartindo risas e momentos moi divertidos.
Aquí van unhas cantas fotos da nosa excursión ao Aquarium Finisterrae, onde aprendemos moito sobre os animais mariños. Pasámolo moi ben e foi unha experiencia increible
Con motivo do Día da Paz, aproveitamos o noso proxecto sobre Exipto para reflexionar sobre valores tan importantes como a amizade, o respecto e a convivencia. Nesta ocasión, o gato Paco fíxonos unha proposta moi especial: inspirándonos nos amuletos exipcios, crear os nosos propios amuletos pola paz.
A idea era elaborar amuletos que nos axudasen a afastar a violencia e a promover a calma, o bo trato e a unión. Así foi como creamos pulseiras-amuleto, escollendo cores e formas con significado, cheas de intencións positivas e bos desexos.
Ademais, Roto, a nosa mascota da clase, deixounos unha tarefa moi simbólica: realizar a pomba da paz. Fixémola utilizando pintura de dedos, experimentando coas cores e expresando, a través da arte, o noso compromiso coa paz.
Esta actividade permitiunos entender que, igual que os antigos exipcios confiaban nos seus amuletos, nós tamén podemos crear símbolos que nos lembren cada día a importancia de convivir en paz, coidarnos uns aos outros e resolver os conflitos con diálogo e respecto 🤍🕊️
Ao comezar o mes de xaneiro decatámonos de algo moi estraño: Paco non viña á clase 🐱. Botabámolo moito de menos, así que decidimos escribirlle unhas cartas para saber como estaba e contarlle canto o agardabamos. Enviámolas con moito cariño, sen saber moi ben onde podería estar.
Pouco despois, chegou a resposta. Paco escribiunos unha carta moi emocionante na que nos contaba que estaba en Exipto e que alí estaba a vivir unha gran aventura. Pediunos que aprenderamos moito sobre este país tan especial para poder acompañalo na viaxe dende a aula. Ademais, contou que non estaba só: estaba cun outro gato… e incluso nos enviou unha foto 📸😺.
Comezamos esta aventura seguindo as indicacións de Roto, a nosa mascota da clase, e tamén do propio Paco, que nos ía guiando coas súas mensaxes e propostas.
Traballamos as pirámides, os templos e as casas nas que vivían no Antigo Exipto, e recreámolas utilizando barro, experimentando coas formas e os materiais.
Tamén coñecemos como era a súa vestimenta e creamos a nosa propia. Primeiro fixemos bosquexos, logo experimentamos con diferentes teas e finalmente elaboramos as nosas vestimentas. Para rematar, fixemos un desfile e sacamos fotos moi especiais.
Traballamos tamén as esculturas, creando as nosas propias esculturas con arxila e pintándoas con acuarelas.
Achegámonos ao mundo das momias e dos sarcófagos, e creamos as nosas momias con papel de xornal e fío branco, aprendendo como se facían no Antigo Exipto.
Por último, traballamos vocabulario relacionado co Antigo Exipto, incorporando novas palabras mentres seguíamos descubrindo esta fascinante civilización.
